TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
MAQSUD ŞEYXZADƏ İKİ XALQIN GÖRKƏMLİ ŞAİRİDİR

AzərTAc xəbər verir ki, dekabrın 17-də Azərbaycan Milli Elmlər Akademiyasının Nizami adına Ədəbiyyat İnstitutunda Azərbaycan və özbək xalqlarının görkəmli şairi Maqsud Şeyxzadənin anadan olmasının 100 illiyinə həsr edilmiş elmi sessiya keçirilmişdir.
İnstitutun direktoru, akademik Bəkir Nəbiyev bildirmişdir ki, Maqsud Şeyxzadə 1908-ci ildə Ağdaşda doğulmuşdur. Atası Məsim bəy Peterburq Tibb Akademiyasını bitirsə də, ədəbiyyat aşiqi olmuşdur. Elə bu səbəbdən də Maqsud Şeyxzadə erkən yaşlardan ədəbiyyata həvəs göstərmişdir. 1918-ci ildə Azərbaycan müstəqilliyə qovuşanda Maqsud Şeyxzadənin 12 yaşı vardı. O vaxtlar atasından aldığı türkçülük eşqi və müstəqillik duyğuları ilə şeirlər yazırdı. Bu şeirlər ona sonralar sürgün, məhrumiyyət və işgəncələr həyatı yaşatmışdır.
Akademik vurğulamışdır ki, atasının Ağdaşda açdığı məktəbdə oxuyarkən Nəriman Nərimanov bu məktəbi ziyarət edir. Əlaçı şagird Maqsudun kürsüdən şeir oxuması N.Nərimanovun çox xoşuna gəlir. O, sonralar həmin şeirlərdən üçünü 1921-ci ildə "Kommunist" qəzetinin 21 dekabr tarixli nömrəsində dərc etdirir. Bir müddətdən sonra Maqsud Şeyxzadə Ağdaşdan Bakıya gələrək H.Cavidin və A.Şaiqin dərs dediyi Bakı Pedaqoji Məktəbində onlardan vətənə, millətə, ədəbiyyata sevgini, türkçülüyü öyrənmişdir. Sonralar Özbəkistanda "Mirzə Uluqbəy" əsərini qələmə alarkən Hüseyn Cavidin ona olan təsirindən də söz açmışdır.
Məktəbi bitirən kimi Dərbəndə göndərilən M.Şeyxzadə müəllimliklə yanaşı şeirlər də yazmışdır. "Azad dağlar qızına", "Şeyx Şamil", "Bu axşam" və "Sahildə" adlı şeirləri dərc olunmuşdur. O, tez-tez Bakıya gələrək, Bakı Pedaqoji İnstitutda oxuyarkən Mayakovski, Nazim Hikmətlə tanış olur.
Çox keçmir ki, Stalinin cəlladları tərəfindən yaxalanan M.Şeyxzadə millətçi damğası ilə həbsə atılır və sürgün edilir. Sonralar M.Şeyxzadəyə türkçülüyün fəal tərəfdarlarının yaşadığı Qafqaza getmək qadağan olunur və atası onu Daşkəndə göndərir...
Tədbirdə filologiya elmləri namizədi Almaz Ülvinin "İki xalqın şairi Maqsud Şeyxzadənin taleyi və yaradıcılığı ədəbi əlaqələr müstəvisində" mövzusunda məruzəsi dinlənilmişdir.
Məruzə və çıxışlarda özbək ədəbiyyatının və ədəbiyyatşünaslığının inkişafında M.Şeyxzadənin əvəzsiz xidmətlərindən və çoxşaxəli fəaliyyətindən ətraflı söz açılmışdır.

 
BAKI DÖVLƏT UNİVERSİTETİNDƏ AZƏRBAYCAN-KOREYA İNFORMASİYA TƏMİNATI MƏRKƏZİ AÇILMIŞDIR

AzərTAc xəbər verir ki, Bakı Dövlət Universitetində (BDU) Azərbaycan-Koreya İnformasiya Təminatı Mərkəzi açılmışdır.
Bu münasibətlə təşkil olunan mərasimdə təhsil naziri Misir Mərdanov çıxış edərək, Azərbaycan ilə Koreya Respublikasının təhsil əlaqələrinin əhəmiyyətini vurğulamışdır. Nazir BDU-da bir sıra xalqların dil və ədəbiyyatları ilə yanaşı, Koreya dili və ədəbiyyatının da tədris olunduğunu diqqətə çatdırmışdır.
Koreya Respublikasının dövlət idarəetmə və təhlükəsizlik nazirinin müavini Yonq No Kim və digər natiqlər yeni mərkəzin xidmətindən səmərəli istifadə ediləcəyinə əmin olduqlarını söyləmişlər.
Sonra tədbir iştirakçıları zəruri texniki avadanlıqla, o cümlədən müasir kompyuterlərlə təchiz edilmiş yeni mərkəzlə tanış olmuşlar.

 

 
AZƏRBAYCAN İLƏ MİSİR ARASINDA ƏLAQƏLƏR UĞURLA İNKİŞAF EDİR

AzərTAc xəbər verir ki, dekabrın 17-də Azərbaycanın xarici siyasət idarəsinin rəhbəri Elmar Məmmədyarov Misir Xarici İşlər Nazirliyinin tərkibində fəaliyyət göstərən MDB ölkələri ilə Texniki Əməkdaşlıq üzrə Fondun baş katibi xanım Safiya İbrahim Aminlə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə ölkələrimiz arasında mövcud münasibətlərin səviyyəsindən məmnunluq ifadə edilmiş, əməkdaşlığın daha da genişləndirilməsinin vacibliyi qeyd olunmuşdur.
S.İ.Amin rəhbərlik etdiyi Fondun ölkəmizlə əməkdaşlığı çərçivəsində Azərbaycanın xarici siyasət idarəsinin vasitəsi ilə bir çox sahələrdə müxtəlif təlimlərin keçirildiyini, habelə Azərbaycan XİN-in Diplomatik Akademiyası ilə səmərəli iş birliyinin mövcudluğunu xüsusi vurğulayaraq, bu tədbirlərin Misirlə Azərbaycan arasında geniş səpkidə uğurla inkişaf edən əlaqələrə töhfə verdiyini demişdir.
E.Məmmədyarov Misir Texniki Əməkdaşlıq Fondu tərəfindən həyata keçirilən layihələrin əhəmiyyətini vurğulamışdır. Nazir Azərbaycanda dərin ənənəyə malik Şərq dillərinin tədrisi sisteminin olmasını qeyd edərək, bu Fond tərəfindən də XİN-in əməkdaşları üçün ərəb dilinin təkmilləşdirilməsi üzrə təlimlərin keçirilməsinin məqsədəmüvafiqliyini bildirmişdir.
Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

 

 
DƏNİZİN ÇİRKLƏNDİRİLMƏSİNİN QARŞISININ ALINMASI İLƏ ƏLAQƏDAR BAKIDA KEÇİRİLƏN REGİONAL KONFRANS BAŞA ÇATMIŞDIR

AzərTAc xəbər verir ki, Bakıda Azərbaycan Respublikası Dövlət Dəniz Administrasiyasının (ADDA) Beynəlxalq Dəniz Təşkilatı (BDT) ilə birgə keçirdiyi "Dənizin çirkləndirilməsinin qarşısının alınması, təmiz, şəffaf və saf şəkildə gələcək nəsillərə çatdırılması" mövzusunda regional konfrans dekabrın 17-də başa çatmışdır.
Dövlət Dəniz Administrasiyasının rəisi Qüdrət Qurbanov regional konfransın yüksək səviyyədə keçirilməsində yaxından iştirak etmiş Beynəlxalq Dəniz Təşkilatının (BDT) nümayəndələrinə minnətdarlığını bildirmişdir. Vurğulanmışdır ki, Azərbaycan şərəfli dənizçilik tarixinə malikdir və əsası ümummilli liderimiz Heydər Əliyev tərəfindən qoyulmuş, hazırda Prezident İlham Əliyev tərəfindən uğurla davam etdirilən xarici siyasətdə beynəlxalq təşkilatlarla əməkdaşlığa xüsusi üstünlük verilir. Respublikamız tərəfindən BDT-nin 20-dən çox konvensiyası, protokol və qətnaməsi ratifikasiya olunmuşdur. ADDA-nın dənizçilik fəaliyyəti ilə məşğul olan dövlət və qeyri-dövlət müəssisələrinin, həmçinin gəmi sahibləri və heyət üzvlərinin beynəlxalq konvensiyaların tələblərinə əməl etmələri istiqamətində ardıcıl iş aparılır.
ADDA-nın rəisi söyləmişdir ki, dənizdə gəmiçiliyin təhlükəsizliyi, ətraf mühitin çirklənməsinin qarşısının alınması, liman və liman vasitələrinin mühafizə sistemi administrasiyanın nəzarətdə saxladığı mühüm sahələrdəndir. Həmçinin ətraf mühitin mühafizəsi məsələləri Azərbaycan hökumətinin diqqət mərkəzindədir.
Azərbaycan bayrağı altında üzən sərnişin gəmilərinin Əmniyyətli İdarəetmə Beynəlxalq Məcəlləsinin (İSM) sənədlər toplusu ilə təmin olunduğu, kadrların peşə hazırlığının artırılması məqsədi ilə BDT-nin regional seminarlarında müntəzəm iştirakının təşkil edildiyi diqqətə çatdırılmışdır.
Bakıda BDT tərəfindən keçirilən növbəti regional konfransın iştirakçılar üçün faydalı olduğu və qazanılan biliklərin gündəlik işdə səmərə verəcəyi əminliklə vurğulanmışdır.
Qüdrət Qurbanov bildirmişdir ki, konfransda iştirak edən 10-a yaxın ölkənin və beynəlxalq şirkətin nümayəndələrinin verdiyi yeni təkliflər ümumi fəaliyyət planında öz əksini tapacaqdır.
Dövlət Dəniz Administrasiyası və Beynəlxaq Dəniz Təşkilatının birgə keçirdiyi tədbirin sonunda dənizin tullantılardan təmizlənməsi sahəsində birgə tədbirlərin həyata keçirilməsi ilə bağlı qərar qəbul edilmişdir.
Üç gün davam edən seminarda mövzu ilə əlaqədar BDT nümayəndələri tərəfindən mühazirələr oxunmuş, təqdimatlar keçirilmiş, mövzu ilə əlaqədar Web-sayt nümayiş etdirilmiş, dinləyiciləri maraqlandıran suallar cavablandırılmış, iştirakçılara müvafiq sertifikatlar verilmişdir.

 
ATATÜRKƏ HƏSR EDİLMİŞ “NUTUK” MİNİATÜR KİTABININ TƏQDİMATI OLMUŞDUR

AzərTAc xəbər verir ki, dekabrın 17-də Azərbaycanda Atatürk Mərkəzində "Nutuk" miniatür kitabının təqdimatı olmuşdur.
Türkiyənin Azərbaycandakı səfirliyinin, elm, mədəniyyət, incəsənət və ictimaiyyət nümayəndələrinin iştirak etdiyi mərasimdə Milli Məclisin deputatı Qənirə Paşayeva Mustafa Kamal Atatürkün türk qadınına böyük sevgisindən söhbət açmışdır.
Türkiyənin ölkəmizdəki səfiri Hulusi Kılıç kitabın Türkiyə dövlətinin qurucusu Atatürkün Cümhuriyyət Xalq Partiyasının 1927-ci il oktyabrın 15-20-də Ankarada keçirilən II Qurultayında söylədiyi tarixi nitqdən ibarət olduğunu bildirmişdir. "Azərbaycanın kədəri bizim kədərimiz, sevinci bizim sevincimizdir" kəlamını xatırladan səfir bunun Azərbaycanda nəşrindən məmnunluğunu söyləmişdir.
Mərkəzin müdiri, Milli Məclisin deputatı Nizami Cəfərov türk dünyasının böyük öndəri Mustafa Kamal Atatürkün Azərbaycanda sevildiyini, qardaş xalqlarımızın mədəniyyətlərinin bir-birinə sıx bağlı olduğunu vurğulamışdır. O, ulu öndər Heydər Əliyevin Azərbaycanda böyük bir mərkəzin Atatürkün adına verilməsi barədə göstərişini yada salaraq, ümummilli liderin "Türkiyə ilə Azərbaycan bir millət, iki dövlətdir" müdrik kəlamını xatırlatmışdır.
Kitabın ərsəyə gəlməsində əməyi olan Zərifə Salahova, Yasemin Bayer və Ləvənd Qafqasiyalı üç cilddən ibarət, 1741 səhifəlik kitabın hər bir vətənvərvər insanın stolüstü vəsaiti olacağına əminliklərini bildirmişlər.
Türkiyənin Bakıdakı səfirliyi adından "Kitab" Cəmiyyətinin İdarə Heyətinin sədri Zərifə Salahovaya və Yasemin Bayerə Fəxri diplom təqdim edilmişdir.
Sonda video vasitəsilə Atatürklə bağlı fotoşəkillər göstərilmiş, nitqi dinlənilmişdir.

 

 
<< Başlat < Önceki 1711 1712 1713 1714 1715 1716 1717 1718 1719 1720 Sonraki > Son >>

Sayfa 1720 > 1744
  TKA 2008