TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
ERMƏNİSTAN SİYASƏTİNİN NÖVBƏTİ RİYAKARLIĞI

Əsir və itkin düşmüş, girov götürülmüş vətəndaşlarla əlaqədar Dövlət Komissiyasından dekabrın 19-da AzərTAc-a daxil olmuş məlumatda deyilir ki, bu il oktyabrın 8-də qoşunların təmas xəttində Ermənistan hərbçiləri tərəfindən naməlum şəraitdə əsir götürülmüş Azərbaycan Ordusunun əsgəri, 1989-cu il təvəllüdlü Həsənov Rafiq Rəhman oğlunun guya Vətənə qayıtmaq istəməməsi barədə Ermənistan mətbuatında yenidən həqiqətəuyğun olmayan məlumatlar yayılmışdır. İki aydan artıq əsirlikdə saxlanılan və daim psixoloji təzyiqlərə məruz qalan Rafiq Həsənov 2008-ci il dekabrın 9-da Beynəlxalq Qızıl Xaç Komitəsinin vasitəçiliyi ilə valideynlərinə göndərdiyi məktubunda Vətənə qayıtmaq arzusunda olduğunu bildirmişdir: «Mən çox fikirləşdim və Vətənə, anamın yanına qayıtmaq barədə qərar verdim. Ümid edirəm ki, tezliklə görüşəcəyik. Narahat olmayın. Bir az da səbr edin, mən tezliklə qayıdacağıma ümid edirəm». Bu faktı beynəlxalq Qızıl Xaç Komitəsi də telefon vasitəsilə Dövlət Komissiyasının İşçi Qrupunun diqqətinə çatdırmışdır.
Vətənə qayıtmaq barədə beynəlxalq təşkilatlara məlumat vermiş və valideynlərinə məktub yazmış R.Həsənovun bir neçə gündən sonra «fikrini dəyişərək» Ermənistan televiziya kanallarına «müsahibə» verməsinin səbəbini izah etmək çətin deyildir.
Müsahibə barədə Ermənistan kütləvi informasiya vasitələrində yayılmış məlumatdan R.Həsənova mənəvi-psixoloji təzyiqlərin göstərildiyi aydın hiss edilir. Bu isə öz növbəsində Ermənistan Respublikasının qoşulduğu beynəlxalq humanitar hüquq normaları və əsirlərlə davranış qaydalarını pozmaqda davam etdiyini bir daha təsdiqləyir. Məlumat belə «təsəvvür yaradır» ki, guya Ermənistanda insan hüquqlarına və ali insani dəyərlərə münasibət o qədər yüksək səviyyədədir ki, hətta əsir götürülmüş Azərbaycan əsgəri bunu «etiraf edir». Əsirlikdən azad olunmuş Azərbaycan vətəndaşlarının Dövlət Komissiyasına verdiyi ifadələr isə Ermənistanda olan rejimin insanlığa və bəşəriyyətə qarşı dəhşətli cinayətlər törətdiyini sübuta yetirir.
Son günlər Avropa Şurası Parlament Assambleyasının gələn ilin yanvarında keçiriləcək qış sessiyasında Ermənistanın bu qurumda olan nümayəndə heyətinin səsvermə hüququndan məhrum ediləcəyi barədə məlumatlar yayılmışdır. Səbəb kimi Ermənistan rəhbərliyinin Avropa dəyərlərinə hörmətsiz yanaşması və öz xalqına divan tutaraq hakimiyyətə gəlməsi göstərilir. Belə bir məqamda azərbaycanlı əsirin «müsahibə verməsi» təsadüfi sayıla bilməz.

 
TARİX XƏYANƏTKARLARIN VƏ QONDARMA İDDİALARIN ÖMRÜNÜN UZUN OLMAYACAĞINI GÖSTƏRƏCƏKDİR

AzərTAc xəbər verir ki, Türkiyədə bəzi şəxslərin ermənilərdən üzr istəmə kompaniyasına başlamaları Azərbaycan-Türkiyə Tarixi Araşdırmalar Fondunun (ATAF) kəskin etirazına səbəb olmuşdur.
ATAF-ın ictimaiyyətlə əlaqələr şöbəsinin yaydığı bəyanatda deyilir ki, Fond bu insanların erməni-türk əlaqələri məsələsində hələ də biliklərinin açıq-aşkar yetərsiz olduğunu görərək təəssüfləndiyini bildirir. Bu anlamda, son hadisələr ATAF-ın həyata keçirməyi planlaşdırdığı maarifləndirmə işlərinin zəruriliyini bir daha sübut edir.
Sənəddə son illərdə Türkiyə ictimaiyyətində qondarma "erməni soyqırımı"nın tanınması ilə bağlı bəzi "ziyalılar" tərəfindən aparılan təbliğat əslində milli mənafelərin nəzərə alınmaması deməkdir.
Özlərini Türkiyə vətəndaşı və türk olaraq tanıdan - Halil Berktay, Ali Erdem, Hülya Engin, Doğan Ahanlı və Taner Akçam Türkiyənin 1915-ci ildə ermənilərə qarşı "soyqırımı" törətdiyini qəbul etməsinin vacibliyini bildirməklə ermənilərin tezisini müdafiə edirlər. Onların bu mövzudakı bütün fikirləri, yazdıqları kitab və məqalələri ermənilər tərəfindən xarici dillərə tərcümə edilərək Avropa və Amerikada yayılır.
Özlərini "insan haqları müdafiəçiləri" kimi təqdim edən bu şəxslər müxtəlif illərdə ermənilər tərəfindən kütləvi şəkildə qətlə yetirilən yəhudiləri, ləzgiləri, kürdləri, türkləri, Ermənistan silahlı qüvvələrinin törətdiyi Xocalı soyqırımı qurbanlarını, 1 milyondan çox azərbaycanlı qaçqın və məcburi köçkünü və ən nəhayət ASALA erməni terror təşkilatı tərəfindən qətlə yetirilən türkiyəli diplomatların haqlarını nədənsə unudurlar.
ATAF bəyan edir ki, bu gün Türkiyədə demokratiya pərdəsi altında həyata keçirilən bu təbliğat kompaniyası insanları süni şəkildə fərqli qruplara ayırmaqla, ölkənin birlik və bərabərliyini, təhlükəsizliyini və gələcəyini ciddi şəkildə zədələməkdədir.
ATAF bir daha bəyan edir ki, onların bu cür təbliğatı yolverilməzdir və əsil türklərin fikirlərini əks etdirmir.
Tarix xəyanətkarların və qondarma iddiaların ömrünün uzun olmayacağını göstərəcəkdir.

 
HÖKUMƏT AZƏRBAYCAN DİASPORUNUN BİRLƏŞMƏSİNƏ HƏR CÜR KÖMƏK GÖSTƏRƏCƏKDİR
Azərbaycan diasporunun qısa müddət ərzində formalaşması olduqca təqdirəlayiqdir. Artıq Azərbaycan diasporu təmsil olunduğu ölkələrdə ictimai-siyasi proseslərə təsir göstərmək iqtidarındadır. AzərTAc xəbər verir ki, bu fikirləri Azərbaycan Prezidentinin İcra Aparatının ictimai-siyasi məsələlər şöbəsinin müdiri Əli Həsənov söyləmişdir. Ə.Həsənov demişdir ki, azərbaycançılıq ideyası yalnız diasporun daha da güclənəcəyi təqdirdə reallaşa bilər. Dünya azərbaycanlıları qarşılarında Azərbaycanın təbliğ edilməsi və problemlərin həlli üçün hökumətə dəstək verilməsi kimi mühüm vəzifələrin olduğunu bilirlər. Bizim də kifayət qədər vəsaitimiz var və hökumət Azərbaycan diasporunun inkişafına hər cür dəstək göstərəcəkdir. Çünki problemlərin həllinin yeganə yolu dünya azərbaycanlılarının sıx birliyi və həmrəyliyidir.
 
ÇÖL QUŞLARI İLƏ BAĞLI MONİTORİNQ BAŞA ÇATMIŞDIR

Kənd Təsərrüfatı Nazirliyi yanında Dövlət Baytarlıq Xidmətindən (DBX) AzərTAc-a bildirmişlər ki, "quş qripi" ilə bağlı dekabrın 15-də başlamış monitorinq davam edir. Dekabrın 19-da çöl quşları arasında monitorinq başa çatmışdır. Ayrı-ayrı quşçuluq və həyətyanı təsərrüfatlarda isə bu iş davam etdirilir.
Abşeron yarımadasında, Dəvəçi, Salyan, Ağcabədi və Lənkəran rayonlarındakı milli park və qoruqlarda, dənizsahili zonalarda çöl quşlarından götürülmüş qan nümunələri və patoloji materiallar Respublika Baytarlıq Laboratoriyasında müayinə edildikdən sonra nəticələr dekabrın 26-da ictimaiyyətə açıqlanacaqdır.
Monitorinqdə Ekologiya və Təbii Sərvətlər, Səhiyyə nazirliklərinin, Ovçular Cəmiyyətinin mütəxəssisləri və əməkdaşları da iştirak edirlər.

 

 
AZƏRBAYCAN İLƏ İORDANİYA ARASINDA EKSTRADİSİYAYA DAİR MÜQAVİLƏNİN RATİFİKASİYA FƏRMANLARININ MÜBADİLƏSİ HAQQINDA PROTOKOL İMZALANMIŞDIR

Xarici İşlər Nazirliyinin mətbuat xidmətindən AzərTAc-a bildirmişlər ki, dekabrın 19-da nazir müavini Xələf Xələfov İordaniya Haşimilər Krallığının Bakıdakı səfirliyinin müvəqqəti işlər vəkili Adil Məhəmməd Adailehlə görüşmüşdür.
Görüşdə Azərbaycan və İordaniya Haşimilər Krallığı arasında ekstradisiyaya dair müqavilənin ratifikasiya fərmanlarının mübadiləsi haqqında protokol imzalanmışdır. Müqavilə 2009-cu il yanvarın 18-dən qüvvəyə minəcəkdir.
Azərbaycan ilə İordaniya arasında tarixən mövcud olmuş əlaqələrin dostluq, qardaşlıq zəminində qurulduğunu bildirən tərəflər, dövlət başçıları arasındakı səmimi münasibətlərin iki ölkənin çoxşaxəli qarşılıqlı əməkdaşlığının möhkəmlənməsinə, dinamik inkişafına böyük töhfə verdiyini qeyd etmişlər.
Nazir müavini münasibətlərin daha da gücləndirilməsi üçün yaradılmış hökumətlərarası komissiyanın mühüm əhəmiyyətini diqqətə çatdırmış, komissiyanın gələn il keçiriləcək növbəti iclasının ölkələrarası ticarət dövriyyəsinin artırılması, iqtisadi əlaqələrin dərinləşdirilməsi məsələlərinə təkan verəcəyini vurğulamışdır.
X.Xələfov Azərbaycan ilə İordaniya arasında növbəti sənədin imzalanmasının və ekstradisiyaya dair müqavilənin qüvvəyə minməsinin bu sahədə ikitərəfli əməkdaşlığın tənzimlənməsi baxımından mühüm rolunu qeyd etmişdir.

 

 
<< Başlat < Önceki 1711 1712 1713 1714 1715 1716 1717 1718 1719 1720 Sonraki > Son >>

Sayfa 1717 > 1749
  TKA 2008