TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
AZƏRBAYCAN ORDUSUNUN MÖVQELƏRİ AVTOMAT VƏ PULEMYOTLARDAN ATƏŞƏ TUTULMUŞDUR

Müdafiə Nazirliyinin mətbuat xidmətindən AzərTAc-a verilən məlumata görə, Ermənistan silahlı qüvvələrinin bölmələri dekabrın 17-də saat 20.10-dan 20.40-dək Goranboy rayonunun Tap Qaraqoyunlu, saat 21.45-dən 22.10-dək Tərtər rayonunun Çiləbürt kəndləri yaxınlığında yerləşən mövqelərdən Azərbaycan Silahlı Qüvvələrinin üzbəüz mövqelərini avtomat və pulemyotlardan atəşə tutmuşlar.
Bütün hallarda düşmən cavab atəşi ilə susdurulmuşdur. İtki yoxdur.

 
BAKIDA DÜNYA AZƏRBAYCANLILARI ƏLAQƏLƏNDİRMƏ ŞURASININ İCLASI KEÇİRİLİR

AzərTAc xəbər verir ki, dekabrın 18-də Bakıda Dünya Azərbaycanlıları Əlaqələndirmə Şurasının Dünya Azərbaycanlılarının Həmrəyliyi günü münasibətilə "Azərbaycan - Şərqin dünyaya açılan qapısı" mövzusunda iclası öz işinə başlamışdır.
Dünya Azərbaycanlıları Əlaqələndirmə Şurası idarə heyətinin sədri, Azərbaycan Milli Elmlər Akademiyasının prezidenti Mahmud Kərimov iclası açdıqdan sonra Azərbaycanın dövlət himni səsləndi.
Dünya azərbaycanlılarının bir araya gəlməsində və həmrəyliyinin möhkəmləndirilməsində, milli diasporun formalaşmasında əvəzsiz xidmətləri olan ümummilli lider Heydər Əliyevin xatirəsi bir dəqiqəlik sükutla yad edildi.
Sonra "Ayrılarmı könül candan..." filmi nümayiş etdirildi.
Diaspor ilə İş üzrə Dövlət Komitəsinin sədri Nazim İbrahimov Dünya azərbaycanlılarının II qurultayından keçən dövr ərzində görülmüş işlərlə bağlı hesabat məruzəsi ilə çıxış etdi.
İclasda məruzə ətrafında çıxışlar olacaq, qarşıda duran vəzifələr müəyyənləşdiriləcəkdir. Azərbaycan həqiqətlərinin təbliği, lobbiçilik fəaliyyəti, soydaşlarımızın yaşadıqları ölkələrdə cəmiyyətə inteqrasiyası, ictimai-siyasi proseslərdə daha fəal iştirakının təmin olunması ilə bağlı məsələlər ətrafında fikir mübadiləsi aparılacaqdır.
İclasda "Dünya Azərbaycanlılarının Həmrəylik Xartiyası"nın layihəsi də müzakirə ediləcəkdir. Bu sənədin məqsədi Azərbaycan dövlətçiliyinin və xalqımızın maraqlarını əks etdirən prinsiplər əsasında xaricdəki soydaşlarımız arasında siyasi-iqtisadi, sosial-mənəvi birliyi formalaşdıran, diasporumuzun qarşısında duran vəzifələri özündə əks etdirən, Azərbaycançılıq ideologiyasına əsaslanan vahid konsepsiya hazırlamaqdır.
İclasda 200-dən çox nümayəndə və qonaq iştirak edir.

 
KUBA AZƏRBAYCAN İLƏ İKİTƏRƏFLİ İQTİSADİ ƏMƏKDAŞLIĞIN İNKİŞAFINDA MARAQLIDIR

Kuba hökuməti Azərbaycan ilə ikitərəfli iqtisadi əməkdaşlığın inkişafında maraqlıdır.
Kubanın ölkəmizdəki səfiri Marselo Kabalyero Torres AzərTAc-ın müxbirinə bildirmişdir ki, gələn il yanvarın sonunda Bakıda iqtisadi əməkdaşlıq üzrə Azərbaycan-Kuba hökumətlərarası komissiyasının ikinci iclasının keçirilməsi planlaşdırılır.
Diplomat demişdir: "Bununla əlaqədar Bakıya Azərbaycan-Kuba hökumətlərarası komissiyasının həmsədri Rikardo Kabrisas Ruisin başçılığı ilə nümayəndə heyəti gələcəkdir. Səfər zamanı mədəniyyət, ticarət, idman, turizm və energetika sahələrinə aid 10-a yaxın saziş layihəsi müzakirə olunacaqdır".
Azərbaycan ilə Kuba arasında iqtisadi münasibətlər ötən ildən yeni inkişaf mərhələsinə qədəm qoymuşdur. 2007-ci ilin sonunda Havanada komissiyanın ilk iclası olmuşdur. İclasda ölkələrimiz arasında iqtisadi əlaqələrin vəziyyəti və inkişaf perspektivləri nəzərdən keçirilmişdir.
Rəsmi statistikaya görə, 2008-ci ilin birinci yarısında ölkələrimiz arasında xarici ticarət dövriyyəsi 8,3 min dollar olmuşdur. Lakin təkcə iyul ayında Azərbaycan mallarının ixracı hesabına ticarət dövriyyəsi 156 min dollar artmışdır.

 
BEYNƏLXALQ ATOM ENERJİSİ AGENTLİYİNİN NÜMAYƏNDƏSİ BAKIYA GƏLMİŞDİR
AzərTAc xəbər verir ki, Beynəlxalq Atom Enerjisi Agentliyinin (BAEA) Azərbaycan üzrə əlaqələndiricisi Andrey Çubov dekabrın 17-də Bakıya gəlmişdir.
Azərbaycan Milli Elmlər Akademiyasının Radiasiya Problemləri İnstitutundan bildirmişlər ki, səfərdən məqsəd ölkəmizdə həyata keçirilən layihələrin icra vəziyyəti ilə tanış olmaq və gələcəkdə BAEA ilə texniki əməkdaşlıq çərçivəsində nəzərdə tutulan layihələrin hazırlığı məsələlərini müzakirə etməkdir.
 
DÜNYA AZƏRBAYCANLILARI ƏLAQƏLƏNDİRMƏ ŞURASININ BAKIDA KEÇİRİLƏN İCLASININ İŞTİRAKÇILARI ULU ÖNDƏR HEYDƏR ƏLİYEVİN MƏZARINI VƏ ŞƏHİDLƏR XİYABANINI ZİYARƏT ETMİŞLƏR

AzərTAc xəbər verir ki, dekabrın 18-də Dünya Azərbaycanlıları Əlaqələndirmə Şurasının Bakıda keçirilən iclasının iştirakçıları Fəxri xiyabana gələrək, müasir müstəqil Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın məzarı üstünə də tər güllər düzülmüşdür.
Sonra qonaqlar Şəhidlər xiyabanını ziyarət edərək, Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, məzarları üstünə tər güllər düzmüş, "Əbədi məşəl" abidəsinin önünə əklil qoymuşlar.
Türk şəhidlərinin xatirəsinə ucaldılmış abidə də ziyarət olunmuşdur.

 
<< Başlat < Önceki 1711 1712 1713 1714 1715 1716 1717 1718 1719 1720 Sonraki > Son >>

Sayfa 1717 > 1743
  TKA 2008