TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
AZƏRBAYCANIN ANKARADAKI SƏFİRİ TÜRKİYƏ SİLAHLI QÜVVƏLƏRİ BAŞ QƏRARGAHININ RƏİSİ İLƏ GÖRÜŞMÜŞDÜR

AzərTAc-ın xüsusi müxbiri xəbər verir ki, dekabrın 19-da Azərbaycanın Türkiyədəki səfiri Zakir Həşimov qardaş ölkənin Silahlı Qüvvələri Baş Qərargahının rəisi, ordu generalı İlkər Başbuğ ilə görüşmüşdür.
Görüşdə İlkər Başbuğ Azərbaycan ilə Türkiyə arasında dostluq və qardaşlıq münasibətlərinin yüksək səviyyəsindən bəhs etmiş, Türkiyənin hər zaman Azərbaycanın yanında olacağını söyləmişdir. O, cari ilin noyabr ayında ilk rəsmi səfərini Azərbaycana etdiyini xatırlatmış, səfər çərçivəsində keçirdiyi görüşlərin səviyyəsindən məmnunluğunu vurğulamışdır. Ordu generalı Dağlıq Qarabağ münaqişəsinin həlli ilə bağlı aparılan danışıqların nəticələri ilə maraqlanmış, bu problemin aradan qaldırılmasında Türkiyənin Azərbaycanı hər zaman dəstəkləyəcəyini bildirmişdir.
Zakir Həşimov Ermənistanın tutduğu qeyri-konstruktiv mövqeyə görə bölgədə həyata keçirilən bütün layihələrdən kənarda qaldığını bildirmiş, Dağlıq Qarabağ münaqişəsi ilə bağlı ATƏT çərçivəsində aparılan danışıqlar haqqında məlumat vermişdir.
Səfir, son zamanlar, Türkiyədə bir qrup ziyalının "erməni soyqırımı" ilə bağlı apardığı "üzr istəmə" kampaniyasına İlkər Başbuğun münasibəti ilə maraqlanmışdır.
İlkər Başbuğ bu kampaniyanın yanlış və zərərli olduğunu vurğulayaraq, Türkiyə ordusunun bununla bağlı açıqlama yaydığını söyləmişdir.
Görüşdə səfirliyin hərbi attaşesi, polkovnik Ənvər İbrahimov iştirak etmişdir.

 
AZƏRBAYCAN VƏ RUSİYA GÖMRÜK İDARƏLƏRİNİN RƏHBƏRLƏRİ TEZ XARAB OLAN MALLARA GÖMRÜK NƏZARƏTİ ZAMANI YARANANPROBLEMLƏRİ MÜZAKİRƏ ETMİŞLƏR

Dağıstan gömrükxanasının "Yaraq Qazmalar" beynəlxalq avtomobil buraxılış məntəqəsində Rusiya Federal Gömrük Xidməti Cənub Gömrük İdarəsinin (CGİ) və Azərbaycan Dövlət Gömrük Komitəsi (DGK) Xaçmaz Gömrük İdarəsinin nümayəndələrinin işgüzar görüşü olmuşdur.
AzərTAc "Dağıstan" informasiya agentliyinə istinadla xəbər verir ki, Rusiya nümayəndə heyətinə CGİ rəisinin müavini vəzifəsini icra edən Georgi Kozlyak, Azərbaycan nümayəndə heyətinə isə DGK Xaçmaz Gömrük İdarəsinin rəisi Sahib Axundov başçılıq etmişdir.
Görüşdə Rusiya-Azərbaycan sərhədindən avtomobil və dəmir yolu nəqliyyatı ilə daşınan tez xarab olan mallara gömrük nəzarəti zamanı yaranan problemlər müzakirə edilmişdir. Yük qatarlarının və müşayiət sənədlərinin tərtib ediməsinə nəzarətin spesifikası məsələsinə baxılmışdır. Bundan əlavə, "Yaraq Qazmalar" və "Samur" buraxılış məntəqələri arasında sərnişin daşımaları marşrutunun təşkil edilməsi barədə çoxdan vaxtı çatmış məsələ də müzakirə edilmişdir. Tərəflər bu cür daşımaların təşkil edilməsinin mümkünlüyü məsələsinə dair maraqlı fikir mübadiləsi aparmışlar.
Rusiya və Azərbaycan gömrükçülərinin bu səviyyədə ilk işgüzar görüşü qarşılıqlı anlaşma və etimad şəraitində keçmişdir. Xatırladaq ki, tərəflər bu görüşə iki il hazırlaşmış, həmin müddətdə zəngin material toplanmışdır.
G.Kozlyak bu cür görüşlər keçirilməsinin əhəmiyyətini vurğulayaraq qeyd etmişdir ki, onlar Azərbaycanın və Rusiyanın gömrük xidmətlərinin eyni məcrada fəaliyyət göstərməsi üçün zəruri münasibətləri tənzimləməyə imkan verir.

 
TBİLİSİDƏ BAKI-TBİLİSİ-QARS YENİ DƏMİR YOLU XƏTTİNİN TİKİNTİSİ İLƏ BAĞLI MÜZAKİRƏLƏR APARILMIŞDIR
AzərTAc xəbər verir ki, dekabrın 18-də Tbilisidə “Bakı-Tbilisi-Qars yeni dəmir yolu bağlantısı” layihəsinin həyata keçirilməsi üzrə Əlaqələndirmə Şurasının V iclası keçirilmişdir. İclasa Azərbaycanın nəqliyyat naziri Ziya Məmmədov və Gürcüstanın iqtisadi inkişaf naziri Laşa Jvaniya sədrlik etmişlər. Həmsədrlər dünyadakı maliyyə böhranının layihə üçün yarada biləcəyi çətinliklərə baxmayaraq, dəmir yolunun tikintisinin dayandırılmayacağınа ümid etdiklərini vurğulamışlar. Azərbaycanın nəqliyyat naziri Ziya Məmmədov iclasdan sonra bildirmişdir ki, görüşdə 7 məsələ müzakirə edilmişdir və onların heç biri ilə bağlı ölkələrimiz arasında fikir ayrılığı yoxdur. Gürcüstanın iqtisadi inkişaf naziri layihənin hər iki ölkə üçün əhəmiyyətli olduğunu bir daha vurğulamışdır və demişdir ki, iclasda layihənin reallaşması üçün əlavə vəsaitlərin cəlb edilməsi məsələsinə də toxunulmuşdur. Ümid edirəm ki, layihənin icrası dayandırılmayacaq və nəzərdə tutulmuş vaxtda başa çatacaqdır.
 
ŞAMAXININ PİRQULU QƏSƏBƏSİ YAXINLIĞINDA 5 BAL GÜCÜNDƏ ZƏLZƏLƏ OLMUŞDUR

Azərbaycan Milli Elmlər Akademiyasının Respublika Seysmoloji Xidmət Mərkəzindən AzərTAc-a bildirmişlər ki, dekabrın 19-da yerli vaxtla saat 19.11-də Şamaxı rayonunun Pirqulu qəsəbəsində 15 kilometr şimal-qərbdə Rixter cədvəli üzrə 5 bal gücündə zəlzələ baş vermişdir. Yeraltı təkanlar Pirqulu və Dəmirçi qəsəbələrində 4,5, Şamaxı şəhərində 4, İsmayıllıda 3,5 bal gücündə hiss olunmuşdur. Zəlzələni digər ətraf rayonlarda da hiss etmişlər.
Köhnə tikililərdə çatlar əmələ gəlmişdir, insan tələfatı yoxdur.
Xatırladaq ki, dekabrın 18-də də həmin ərazidə 3 bal gücündə zəlzələ qeydə alınmışdır.

 
RUSİYAYA MƏXSUS “SARMAT-1” GƏMİSİNDƏ TƏMİR İŞLƏRİNƏ BAŞLANILMIŞDIR
Dövlət Dəniz Administrasiyası rəisinin müavini Namiq Ağamalıyev AzərTAc-a bildirmişdir ki, Xəzər dənizində batmaq təhlükəsi ilə üzləşən, Azərbaycan tərəfinin xilas etdiyi Rusiyaya məxsus “Sarmat-1” gəmisində təmir işlərinə başlanılmışdır. N.Ağamalıyev demişdir ki, təmir işləri ən geci bir həftəyə yekunlaşmalıdır. Qəzanın başvermə səbəbinin ilkin versiyaya uyğun olduğunu açıqlayan DDA rəsmisi bildirmişdir ki, qasırğa şəraitində gəminin sükan hissəsinə su dolmuş, elektrik avadanlığı tamamilə sıradan çıxmışdır. Tam texniki baxışdan və yoxlamalardan sonra yükün boşaldılması qərara alınmışdır. Xatırladaq ki, Dübəndi limanından 30 mil aralıda (təqribən 55 kilometr) batmaq təhlükəsi ilə üz-üzə qalan “Sarmat-1” gəmisi gecə saatlarında Azərbaycana məxsus “Vadim Seyidov” gəmisi tərəfindən yedəyə alınaraq xilas edilmişdir. Həştərxan-Ənzəli (İran) reysi ilə hərəkət edən gəmi təqribən 1750 ton metal məhsullar və ağac materialı daşıyırmış.
 
<< Başlat < Önceki 1701 1702 1703 1704 1705 1706 1707 1708 1709 1710 Sonraki > Son >>

Sayfa 1710 > 1744
  TKA 2008