TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
AZƏRBAYCANIN VƏ TÜRKİYƏNİN HƏRBİ SAHƏDƏ ƏLAQƏLƏRİ VƏ GƏLƏCƏK İNKİŞAF PERSPEKTİVLƏRİ BARƏDƏ MÜZAKİRƏLƏR APARILMIŞDIR
AzərTAc xəbər verir ki, dekabrın 22-də Azərbaycanın müdafiə naziri, general-polkovnik Səfər Əbiyev Bakıda səfərdə olan Türkiyə Respublikası Baş Qərargah rəisinin müavini, ordu generalı Hasan İğsızla görüşmüşdür.
Müdafiə Nazirliyinin mətbuat xidmətindən bildirmişlər ki, görüşdə ikitərəfli hərbi əməkdaşlıq planına uyğun olaraq, Azərbaycan və Türkiyənin hərbi sahədə əlaqələri və gələcək inkişaf perspektivləri barədə ətraflı müzakirələr aparılmışdır.
Görüşdə Türkiyənin ölkəmizdəki səfiri Hulusi Kılıç iştirak etmişdir.
 
ERMƏNİSTAN MÜXALİFƏTİ QANLI MART HADİSƏLƏRİNİN İLDÖNÜMÜNÜ QEYD EDƏCƏKDİR

AzərTAc xarici KİV-lərə istinadla xəbər verir ki, Ermənistanda müxalifət lideri Levon Ter-Petrosyanın rəhbərliyi ilə Erməni Milli Konqresinin 2008-ci ilin yekunlarına dair konfransı keçirilmişdir.
Hakimiyyətin konfransı keçirmək üçün yer ayırmaqdan imtina etməsi səbəbindən konqres toplantısını kiçik zalda təşkil etməyə məcbur olmuşdur.
Əsas siyasi, ictimai partiya və təşkilatları birləşdirən Erməni Milli Konqresinin konfransında Ermənistanda Konstitusiyanın bərqərar olunması və ölkədə hökm sürən maliyyə böhranı müzakirə edilmişdir. Müxalifət lideri Levon Ter-Petrosyan 1 mart hadisələrinin araşdırılması ilə bağlı maraqlı bəyanat vermişdir. Ter-Petrosyan demişdir ki, müxalifət silahlı qarşıdurma zamanı dinc nümayişçilərə güllə atan maskalı polislərin hamısının şəxsiyyətini müəyyən etmişdir. Avtomobilləri yandıran və mağazaları qarət edənlərə yüksək rütbəli 5 rəsmi şəxs və 4 məşhur oliqarx rəhbərlik etmiş, hakimiyyətə tabe olan quldur qruplarındakı üzvlərin sayı isə 950 nəfər olmuşdur. Bütün bu məlumatlar mart hadisələrinin araşdırılması ilə məşğul olan qrupa, Avropa Şurasının insan haqları üzrə komissarı Tomas Hammerberq və İrəvanda akkreditə olunan diplomatik missiyaların rəhbərlərinə göndərilmişdir.
Ermənistanın 1-ci prezidenti onu da bildirmişdir ki, müxalifətin əldə etdiyi ən böyük nailiyyət insan tələfatı ilə nəticələnən qanlı mart hadisələrinə dair beynəlxalq ictimaiyyətin hazırkı rejimin təqdim etdiyi fərziyə ilə razılaşmamasıdır.
Konfransda qeyd edilmişdir ki, gələn il martın 1-də Erməni Milli Konqresi faciənin 1-ci ildönümü ilə bağlı İrəvanın mərkəzində ümumrespublika aksiyası keçirəcəkdir.

 
AZƏRBAYCAN VƏ RUSİYA XARİCİ İŞLƏR NAZİRLƏRİNİN MÜAVİNLƏRİ MOSKVADA GÖRÜŞMÜŞLƏR

Dekabrın 22-də Moskvada Azərbaycan və Rusiya xarici işlər nazirlərinin müavinləri Xələf Xələfov ilə Qriqori Karasin görüşmüşdür.

AzərTAc Rusiya XİN-in mətbuat xidmətinə istinadla xəbər verir ki, görüşdə ikitərəfli münasibətlərə dair məsələlər müzakirə olunmuşdur.
Danışıqlar işgüzar və konstruktiv şəraitdə keçmişdir.

 
BAKIDA İSLAM DÖVLƏTLƏRİ QADIN VƏ İDMAN ASSOSİASİYASININ İDMANIN İNKİŞAFI KOMİTƏSİNİN İLLİK YEKUN İCLASI KEÇİRİLMİŞDİR

AzərTAc xəbər verir ki, dekabrın 22-də Milli Olimpiya Komitəsində İslam Dövlətləri Qadın və İdman Assosiasiyasının İdmanın İnkişafı Komitəsinin "Təhsil, mədəniyyət və idman sahəsində qadın idmanının inkişaf perspektivləri" mövzusunda illik yekun iclası keçirilmişdir.
Tədbirdə İslam Dövlətləri Qadın və İdman Assosiyasiyası İdmanın İnkişafı Komitəsinin prezidenti Zəhra Yusefi (İran), Tacikistan Olimpiya Komitəsinin nümayəndəsi Nərgiz Nəbiyeva, Banqladeş Olimpiya Komitəsinin üzvü Ferdovs Ara Xanam və Sudan Qadın İdman Milli Assosiasiyasının nümayəndəsi Həlimə İbrahim İsaq iştirak etmişlər. Azərbaycanı iclasda İdmanın İnkişafı Komitəsinin üzvü Könül Nurullayeva təmsil etmişdir.
Tədbirdən sonra mətbuat konfransında assosiasiyanın İdmanın İnkişafı Komitəsinin prezidenti Zəhra Yusefi demişdir ki, rəhbərlik etdiyi qurumun əsas məqsədi islam ölkələrində qadınların idmana daha çox cəlb olunmasına şərait yaratmaqdır. Qurumun səyi nəticəsində növbəti Olimpiya Oyunlarında qadınların iştirakı əhəmiyyətli dərəcədə artacaqdır. Milli Olimpiya komitələrində qadın üzvlərin sayı 30 faizdən aşağı olacağı təqdirdə həmin ölkələr 2012-ci il London Olimpiadasına buraxılmayacaqlar. Biz hesab edirik ki, qadınların Milli Olimpiya komitələrində daha çox təmsil olunması zərif cinsin nümayəndələrinin idmana cəlb olunmasına təkan verəcəkdir.
İdmanın İnkişafı Komitəsinə üzv ölkələr qonşu dövlətlərdə də qadınların idmanda rolunu diqqət mərkəzində saxlamalıdırlar. Komitə eyni zamanda, islam ölkələrində qadınların təhsili, mədəniyyəti və maarifləndirilməsi işinə xüsusi diqqət yetirir.
Azərbaycanda qadınların idmanda iştirakını yüksək qiymətləndirdiyini deyən qonaq, bunun nəticəsi kimi İdmanın İnkişafı Komitəsinə ölkəmizin üzv qəbul olunduğunu söyləmişdir.

 
"ÇİNAR" ANSAMBLI SANKT-PETERBURQDA "DOSTLAR FESTİVALI"NIN XATİRƏ NİŞANINA LAYİQ GÖRÜLMÜŞDÜR
AzərTAc xəbər verir ki, Sankt-Peterburqda sosial-mədəni "Tolerantlıq" proqramı çərçıvəsində "Dostlar festivalı" qala-konsert keçirilmişdir. Məqsəd cəmiyyətdə qarşılıqlı anlaşma şəraiti yaratmaq, gənclər arasında tolerantlığı gücləndirmək və Rusiyanın ikinci paytaxtında yaşayan müxtəlif etnik qrupların nümayəndələrinə qarşı dözümlü münasibət formalaşdırmaq olmuşdur. Çin, polyak, gürcü, erməni, latış, ləzgi, başqırd və digər xalqların nümayəndələrinin iştirakı ilə keçirilən festivalda ölkəmizi Azərbaycanın Sankt-Peterburqdakı baş konsulluğunun nəzdində fəaliyyət göstərən "Çinar" rəqs ansamblı təmsil etmişdir. Tamaşaçılar qarşısına "Yallı" rəqsi ilə çıxan yeniyetmə soydaşlarımızın çıxışı alqışlarla qarşılanmışdır. Onlar festivalın xatirə nişanı və qiymətli hədiyyələrlə mükafatlandırılmışlar.
1998-ci ildə yaradılmış ansamblın rəhbəri Sankt-Peterburq Dövlət Universitetinin müəllimi Xeyransa Mirzəyevadır. Hazırda 4 yaşından 18 yaşınaqədər 80-dən çox həmyerlimiz onun başçılığı altında Azərbaycan rəqslərini öyrənir, ölkəmizi mədəni-kütləvi tədbirlərdə ləyaqətlə təmsil edirlər.
 
<< Başlat < Önceki 1701 1702 1703 1704 1705 1706 1707 1708 1709 1710 Sonraki > Son >>

Sayfa 1710 > 1749
  TKA 2008